Busturialdeko Hitza

Euskal Jaiak izan duen harreragaz pozik azaldu dira Gernika-Lumoko udal ordezkariak. Jaietako zinegotzi Jesus Mari Alberdik esandakoaren arabera, "jendea ibili zen bai Pasealekuan zein San Juan Ibarra plazan". Euskal Jairako atera dituzten zapiak ere "ia denak" saldu dituztela adierazi du. "2.900 atera genituen eta 2.000 saldu ditugu". Gaueko kantaldian ere mila lagun baino gehiago batu zirela argitu du.

Datu horiek adierazgarriak direla azaldu du Alberdik. Dena den, hobetzeko asko dagoela argi du. "Datorren urtera begira argi dut jai herrikoiagoa eta parte-hartzaileagoa bultzatu behar dugula". Kaleko giroa eta herritarren parte-hartza indartu gura du jaietako zinegotziak. "Herritik datorren jaia izan behar da, eta jendearen parte-hartzea bultzatu behar da, ez bakarrik egun horretan bertan, baita antolatzerako orduan ere". Horrela, herritarren parte-hartzea beharrezkotzat jo du. "Aurten Barakaldotik eta beste hainbat herritik etorri da jendea Euskal Jaian parte hartzeko, eta bertoko asko hondartzara joan dira", kritikatu du Alberdik.
Horrela, datorren urtera begira, besteak beste, bazkari herrikoia egitea ere aztertuko du Udalak. "Kalean bazkaltzeko aukerarik ez izateaz kexu izan dira zenbait herritar".

Jose Mari Gorroño Gernika-Lumoko alkateak ere jaiaren balorzaio positiboa egin du. "Egia da jendea hondartzara joan dela egun horretan, uda txarra egiten ari dela eta, eguna probetxatzeko. Hala ere, Euskal Jaia egiten den lehenengo urtea izateko arrakasta izan du, nire ustez". Ia zapi denak saltzeak ere garrantzia duela uste du Gorroñok, eta zapatuko giroagaz jendea pozik dagoela esan du. "San Juan Ibarra plaza umeekin beteta egon zen, eta Pasealekuan ere jende asko ibili zen".
Hurrengo urtera begira, hala ere, gauzak hobetu daitezkeela uste du, "eta hobetu egingo ditugu. Nik balorazo ona egiten dut eta hurrengo urtean jende gehiagok parte hartuko duela uste dut".