Busturialdeko Hitza

2007an jarri zuen martxan Eusko Jaurlaritzaren Ingurumen sailak ‘Baccharis hamilifolia’ espeziea erauzteko proiektu pilotua. Gaur ezagutarazi dituzte emaitzak. Jaurlaritzako Bioaniztasun eta Ingurumen Partaidetza zuzendari Elisa Sainz de Murietan argitu duenez, «Forua eta Kortezubi udalerrietako goi padurako hamabi hektareatan esku hartu ondoren, espeziearen 104.000 ale erauzi dira orotara».

Gune jakin batzuetan belar-hiltzaile sistemiko bat ezarrita egin dute erauzketa landare handienen kasuan. Ale txikiak, aldiz, errotik atera dituzte eskuz. Emaitzak positiboak izan direla dio Sainz de Murietak. «Apenas birsortu da espezie inbaditzailea, %14a soilik, gutxi gorabehera». Gainera, espezie autoktonoa, lezka, «indarrez berragertzen ari da».

Sainz de Murietaren arabera, «Urdaibaiko estuarioaren 90 hektareatan dago `Baccharis hamilifolia´ espeziea» eta, beraz, Forua eta Kortezubiko hamabi hektarea horietan aritu ondoren, 2008an proiektua garatzen jarraituko dute, beste hamabost-hamazazpi hektareatan hasiko direlarik landarea erauzteko beharrean. Kasu horretan, «metodologia zainduagoa» erabiliko dute. «Hala, azalera unitate bakoitzeko emaitza hobeak lortu ahal izango dira, kostu ekonomikoa gutxituz».

Beste alde batetik, «prebentzioa oso garrantzisua» dela esan zuen Sainz de Murietak. Hori dela eta, «herritarrak espezie exotiko inbaditzaileek naturgunean eta bioaniztasunean duten eragin kaltegarriaz informatzeko eta sentsibilizatzeko kanpaina» jarri zuten martxan iaz. Aurten, berritasun gisa, `Landare arrotz inbaditzaileak Urdaibai Biosfera Erreserban´ gidaliburua kaleratu dute.