Busturialdeko Hitza

Urazca euskal enpresak ordainketak eteteko eskaera aurkeztu du asteon merkataritza-arloko Bilboko bigarren epaitegian. Erabaki horren ondorioz, Gernika-Lumoko erresoluzio handiko zentroaren obrak geldituta daude.

Erresoluzio handiko zentroaren eraikuntzan dauden beharginen esanetan, «apirilaren 30ean, ordainketa-egunean, langileen bulegora deitu zuten enpresaren arduradunek nominen dirua ingresatuko ez zutela esanez. Hala ere, banketxeekin akordio batera heltzeko negoziazioak hasiko zituztela esan ziguten». Negoziaketak, baina, ez zuen aurreikusitako emaitzarik eman eta, ondorioz, aste honetan ordainketak eteteko eskaera egin du Urazcak.

Gauzak horrela, bizi duten egoera «larria» dela diote langileek, soldatarik ez kobratzeaz gain, ez baitute langabezira jotzeko aukerarik. Hortaz, «kaltetu bakarrak» eurek direla uste dute. «Egin dezakegun gauza bakarra itxarotea da». Hornitzaileek ere ez dute materialerik eramango aurrerantzean, eta atzo bertan garabiaren aginteak kendu zizkieten. Euren esanetan, «ziur aski astelehenean argi-indarra moztuko dute».

Eraikuntzatik eta etxebizitzen salerosketatik etorritako sarrerak izan dira orain arte Urazca enpresaren diru iturri garrantzitsuenak eta, dirudienez, sektoreak bizi duen «gainbeheran» dago arazoaren muina. Guztira, 90 milioi euroko zorra dauka eta epaitegietan ordainketak eten ostean, laster hasiko da berorren hartzekodunen lehiaketa. Modu horretan, bere pasiboa modu ordenatu batean kitatuko du Urazcak.

Bien bitartean, erresoluzio handiko zentroa «urgentea» den heinean, euren egoerari irtenbidea emateko aukera Osakidetzak esku hartzea da erresoluzio handiko zentroaren obrako langileen arabera.